Ambokile alitwaa tuzo hiyo baada ya kuwashinda wenzake wawili, Ibrahim Ajibu wa Yanga na Stamili Mbonde wa Mtibwa Sugar alioingia nao fainali katika uchambuzi uliofanywa Dar es Salaam wiki hii na Kamati ya Tuzo ya TPL.
Tuzo hiyo mara ya kwanza kwa msimu huu ilichukuliwa na straika wa Simba, Meddie Kagere baada ya kuiwezesha timu yake kuibuka na ushindi katika mechi mbili za mwanzo dhidi ya Tanzania Prisons na Mbeya City.
Kamati ya Tuzo za Wachezaji Bora Ligi Kuu Tanzania Bara, imeanzisha tuzo mpya ya Kocha Bora wa mwezi itakayokuwa inatolewa kila mwezi kwa lengo la kutambua mchango wa kocha husika katika ligi hiyo.
Baada ya kamati kukaa chini na kuanzisha tuzo hizo, ya kwanza imefanikiwa kwenda kwa Kocha wa Mbao, Amri Said akiwa kama Kocha bora wa mwezi Agosti.
Vilevile Kocha wa Yanga, Mwinyi Zahera, ametwaa tuzo hiyo akiwa kama Kocha bora wa mwezi Septemba.
Tuzo hizo ni chachu kwa makocha wote wa Ligi Kuu Bara kama changamoto ya kuhakikisha klabu zao zinafanya vizuri ili kujitengenezea mazingira ya kuwa washindi kila mwezi.
